Patay na ang police escort ni Masiu, Lanao del Sur Mayor Nasser Pangandaman, Jr., kinsa samaran sa pag-ambush sa convoy sa mayor niadtong Dominggo, Nobyembre 10, sa Barangay Gata, lungsod sa Buadiposo Buntong, Lanao del Sur.
Gikumpirma ni Colonel Madzgani Mukaram, director sa Lanao del Sur Provincial Police Office, nga nabugtoan sa iyang kinabuhi si Staff Sergeant Jabbar Romato Pangandaman, alas-7:00 sa buntag niadtong Lunes, samtang anaa sa Amai Pakpak Medical Center sa Marawi City tungod sa mga samad-pinusilan sa iyang tiyan.
Ang laing duha ka mga sibilyang samaran anaa na sa luwas nga kahimtang sa susamang tambalanan.
Gibanhigan sa mga armadong lalaki ang convoy ni Mayor Pangandaman samtang paingon unta ngadto sa iyang munisipyo sa Masiu aron manguna sa ipahigayong municipal peace and order council meeting.
Gamit sa mga suspek ang tag-as nga de kalibreng klase sa armas sa ilang pagpamanhig.
Nakalingkawas sa pagpangambush ang mayor.
(Divina Suson)
