LA PAZ, Leyte – Ginpamumusil patay han pulis an usa nga mekaniko ha Poblacion District 3, La Paz, Leyte, alas 10:30 kasangkulop.
Ginkilala an biktima nga hi, Adan Tejero 37 anyos, may asawa, usa nga mekaniko ngan residente Ha Brgy. Victoray La Paz, Leyte.
Ginkilala naman an suspek nga pulis nga hi SPO1. Retchie Ramelo, 38 anyos, naka-assign ha PRO 4A, Camp Vicente Lim, Calamba, Laguna; ngan hi Ricardo Gausin, 33 anyos, waray asawa, usa nga laborer ngan residente ha Brgy. Miring, Tabon-Tabon, Leyte.
Ha nagawas nga inisyal nga imbistigasyon han mga otoridad, nagmumulay hin chess an biktima ha La Paz Shopping Square han tigda nga umabot an suspek nga pulis sakay han single nga motor upod an usa pa nga suspek, dumaop an pulis ha biktima ngan tigda nala ginpamumusil ha pira nga parte han lawas an mekaniko.
Nadara pa an biktima ha Burauen District Hospital pero dead on arrival na ini
Sumala KAN PSSupt. Norberto Tuazon, PNP Provincial Director, may personal nga away an biktima ngan an suspek sobra na usa kadekada an nakalabay pero ha pagbisita han pulis ha La Paz nahinumduman niya an ira away.
Pinaagi han gindumara nga hot pursuit operation han mga kapulisan, nadakop an suspek ha Brgy. Cabacangan, Dulag, Leyte. Nakompiska tikang ha suspek an Cal. 45 nga pusil.
Paslak na an suspek nga pulis ngan papasakahan hin kaso nga murder.
