Patay ang usa ka pulis ug samaran ang iyang 9 anyos nga anak-lalaki, human sila gipamusil sa wala mailang riding in tandem, pasado alas-4:00 kagahapon sa hapon, sa may Awar Street, Barangay East Basak, Marawi City.
Gi-ila ni Colonel Madzgani Mukaram, director sa Lanao del Sur provincial police office, ang namatay’ng biktima nga si Patrolman Abdul Mojib Barolbae Ditucalan, samtang iyang anak si Abdul Mojib Ditucalan, Jr.
Na-assign si Ditucalan sa Personnel Holding and Accounting Unit (PHAU) sa Provincial Police Office sa Lanao del Sur.
Gideklara si Ditucalan nga dead on arrival sa Amai Pakpak Medical Center (APMC) sa Marawi tungod sa daghang samad-pinusilan sa iyang lawas, samtang ang iyang anak nakaangkon og gamay’ng samad sa ulo nga gitambalan na sa susamang hospital.
Matud pa ni Mukaram nga nagmaneho si Ditucalan sa iyang Toyota Vios pa-uli sa iyang pinuy-anan dihang gipusil kini.
Nakuha sa imbestigador sa pulis ang mga basiyo sa bala sa kalibre 45 sa dapit.
Gi-imbestigahan na sa mga utoridad ang motibo ug ang pag-ila sa mga suspek. (Divina M. Suson, March 6)
