Patay si SPO2 Antonio Broce matapos magresponde sa away ukon gamo sa unhan lang sa ila panimalay sa Barangay 21, Relocation Site, Victorias City.
Off duty ni SPO2 Broce sang amo nga tion gani ara siya sa ila puluy-an upod ang iya 7 ka mga kabataan kag asawa.
Sang amo nga tion, samtang nagahimo snag iya obligasyon bilang amay sang puluy-an, nakabati si SPO2 Broce sang linupok sa unhan sang ila balay.
KOMOSYON
Ginabanta 350 meters halin sa puluy-an sang pulis, nagluntad ang pagbinaisay sa tunga sang suspek nga si Richard Artagame kag ang biktima nga si Edgar Saludes nga kilala sa lugar nga nagapataya sang Small Town Lottery ukon STL.
Suno sa mga residente, hinali lang nga gintiro ni Richard si Edgar sang lima (5) ka beses. Sa pihak sang pilas nga naangkon, nagtinguha si Edgar nga magpadulong sa balay ni SPO2 Broce agud magpangayo sang bulig.
Ginlagas pa ini sang suspek apang bangod madamo sang tawo, nagbalik ini sa bangga kag pasimple nga nagchange magazine sang iya bitbit nga .45 kalibre nga armas.
Nagpamahog pa sa mga naga-agi nga motorista si Richard.
Sa pihak nga bahin, sang nabatian ni SPO2 Broce ang linupok, gilayon ini nga naggwa s aila puluy-an bitbit ang iya service firearm.
Nagwarning shot pa kuntani si SPO2 Broce apang ginhimo nga taming ni Richard ang babaye nga angkas sang driver sang motorsiklo nga iya tuyo kuhaon.
Nagtuyo pa kuntani nga magnegosyar ang pulis apang ginluthang ini ni Richard sang makatatlo ka beses, naigo sa wala nga bvahin snag dughan ang pulis nga nangin tunaan man sang iya kamatayon.
Nahingagaw naman dala sa ospital si Edgar kag karun ara na sa estable nga kondisyon.
Nagpalagyo pa ang suspek matapos ang insidente apang nadakpan man ini kag detained na karun sa Victorias City Police Station
Photo (c) JP Generoso
