Davao City – Dead on arrival ang usa ka pulis sa dihang nakaangkon og daghang samad-pinusilan sa nahitabong shooting incident atbang sa may Ponte Trade Master, CP Garcia Highway, Buhangin District, Davao City alas 6:10 sa gabii kaganina.
Sa report gikan sa Police Regional Office kun PRO XI, giila ang namatay nga si SPO1 Roger Padayogdog nga sakop sa RMFB XI diha sa Camp Merecido, Buhangin ning syudad sa Davao diin matud pa sa mga kakaubanan niini, nakasinati og ‘emotionally distress’ ang maong pulis.
Sa inisyal nga imbestigasyon, adunay komosyon matud pa nga nahitabo sa nasangpit nga lugar tali sa usa ka pulis ug Pedicab driver nga giilang si Ronald Bala diin kuno gi-binggahan siya ni SPO1 Padayogdog.
Daling mitawag og police assistance ang mga residente sa lugar apan sa dihang miresponde ang kapulisan, namusil matud pa si SPO1 Padayogdog hinungdan nga napugos usab ang mga miresponde nga i-neutralisa ang maong pulis.
Gidala pa sa Southern Philippines Medical Center kun SPMC ang pulis apan gideklara na kining dead on arrival.
Sa karon, nagpadayon pa ang imbestigasyon sa kapulisan bahin sa maong insidente.
RadyoMaN Renz Barbarona
