Davao City – Pakusgan sa kapulisan ang koordinasyon ngadto sa mga tanods sa barangay dinhi sa Davao City.
Matud ni Davao City Police Office head Police Col Alexander Tagum nga buot niining maplastar og tarong ang mga tahas sa matag tanods nga maoy silbing force multipliers sa mga awtoridad sa pagpakgang sa krimen sa matag lugar.
“Gipaabot nato sa office of the City Mayor nga mag-conduct mi og re-orientation ug training. I- formalize nato ang organization and coordination nila with our local police para mas mahimong epektibo ug mabati sa mga katawhan sa Davao ang ginahimong mas hugot nga pagbantay sa atoang mga barangay tanod,” matud ni Tagum.
Gilantaw ni Tagum nga kung hanas na ang mga tanods dako gayod kining ikatabang sa kapulisan diha sa city-wide nila nga programang Ronda Patrol aron makontrola ang problema sa kawat, gangsterism ug uban pang matang sa krimen.
Sumala ni Tagum parte sa ilahang i-request ngadto kang Mayor Inday Sara Duterte-Carpio nga maisyuhan og uniporme ug mga gikinahanglang ekipo ang mga tanods inig matapos ang Midterm Elections.
“Apil na sa atoang hangyo nga human sa election para dili maapil sa election ban nga maisyuhan ang mga barangay tanods og ilahang mga patrol uniforms, patrol vests nga naay mga markings and patches nga mag-indicate nga member sila sa barangay ronda patrol apil na diha ang batuta, flashlight ug kada team would have atleast one radio para naa silay direct contact sa mga police stations,” sumala ni Tagum.
RadyoMaN Aimee Guinita
