Manila, Philippines – Patay na si Po2 Joey Imperial 45 anyos , dating Police Manila, inilipat sa QCPD at ngayon ay nakatalaga sa NCRPO matapos na tambangan ng dalawang lalaking sakay ng motorsiklo sa harap ng kanilang bahay sa 2106 sa Kalabash Road Brgy 539 Zone 53 Sampaloc Maynila alas-6:45 kaninang umaga.
Idineklara ni Dr. Gilbert Robin, ang attending Physician ng United Doctors Medical Center na binawian na ng buhay si PO2 Imperial alas -8:35 umaga kanina.
Ayon sa doctor, nagtamo ng dalawang tama ng bala ng baril malapit sa puso, isa sa tiyan at mga braso si PO2 Imperial.
Una rito, nagbabasa ng dyaryo sa harap ng pintuan ng kanyang bahay si PO2 Imperial nang dumating ang dalawang suspek na sakay ng isang motorsiklo.
Agad umanong binaril ng isa sa suspek si PO2 Imperial na nagawa pang makipagpambuno sa suspek.
Bagaman may tama na ng bala ay nagawa pang makatakbo ni PO2 Imperial papasok sa loob ng kanyang bahay ngunit sinundan pa ng suspek saka nagsitakas.
Agad isinugod ng kanyang misis sa UDMC ang pulis ngunit makalipas ang ilang oras ay binawian din ng buhay dahil sa mga tama ng bala ng kalibre 45 sa dibdib at tiyan.
