Positibo nga gin-identify ni PO1 Dorben ‘Benjo’ Acap nga si PO2 Melvin Mocorro ang nagluthang sa iya sang nagligad nga Martes, Hunyo 26, 2018 sa Dulonan, Arevalo.
Sa exclusive interview sang RMN Iloilo kay PO1 Acap, iya gintuad nga halin pa lang sa Campo Delgado , nagasunod na sa iya ang duha ka motorsiklo kon sa diin, isa ang nagasakay sa isa ka motorsiklo kag duha naman ang sakay sa isa pa ka motorsiklo .
Ginpahayag ni Acap nga nagpaliko-liko siya sang algyan kag nag-agi sa Iloilo City Hall kag Muelle Loney padulong sa Dulonan, Arevalo apang padayon nga nagasunod ang duha ka motorsiklo.
Iya nakita sa side mirror nga malapit na ang motorsiklo sa salakyan kag may panagupnop siya nga may malain nga matabo .
Suno kay Acap, apat ka lupok ang iya nabatian kag naigo siya sa wala nga butkon .
Ginpahayag ni Acap nga iya gindulog ang salakyan gani abi sang mga suspek, napatay na nila ini rason nga ginlibutan siya sang riding-in-tandem para ‘i-finishing ‘ .
Bangud tinted ang salakyan kag wala siya makita sang mga suspek, nag-retaliate siya kag gintiro ang riding-in-tandem kon sa diin naigo kag nahulog sa motorsiklo ang backrider nga iya gin-identify nga si PO2 Melvin Mocorro.
Suno kay Acap nga indi niya kilala personal si Mocorro apang masami lang niya ini makita nga nagagwa-sulod sa Campo bangud naga-duty siya sa gate sa Campo Delgado .
Gin-athag ni PO1 Acap nga indi daan nga hiligut-anon ukon road rage ang rason sang pagpangluthang.
Nagapati siya nga tuyo gid siya patyon sang mga suspek.
Samtang, ginpahayag ni PO1 Acap nga indi sila ‘close’ ni PO2 Stephen Magno nga una na nadakpan sa buybust operation kag ginaangut sa iya pangalan.
Ginpahayag ni Acap nga nagakitaay lang sila sa tagsa nga magduty sa gate sa Campo Delgado.
Emosyunal si Acap kag gin-athag nga nag-loan siya indi agud i-finance sa illegal nga droga kundi agud gawaron ang pula nga awto nga ginapanag-iyahan sang iya amay.
Ginpamilit ni PO1 Acap nga indi siya involve sa illegal nga droga kag indi niya pag-akuon ang butang nga wala niya ginahimo.
Suno kay Acap nga wala siya sang ideya kon ngaa siya gid ang ginahingabot apang wala siya nagakumpyansa bangud indi niya mapiho kon sin-o ang kontra kag kon sin-o ang indi.
Nagapanawagan si PO1 Acap kay Police Regional Office 6 Director PCSupt. John Bulalacao sang due process kag hatagan siya sang oportunidad nga depensahan ang kaugalingon sa legal nga paagi kon may nahimo siya nga sala.
Ginpahayag ni PO1 Dorben Acap nga nasubuan siya sa natabo bangud ang kaangay man lang niya nga pulis ang nagtuyo nga magpatay sa iya.
Dugang pa ni Acap nga wala niya ini naluyagan bangud apektado ang organisasyon kag nagakadula ang respeto sang mga sibilyan.
Ginpahayag ni Acap nga kon mahimo ini sang police sa kaangay niya nga police, ano pa ayhan sa mga ordinaryo nga sibilyan.
