Naglunsad ng mas pinaigting na inspeksyon sa gabi ang Urdaneta City Police Station bilang bahagi ng kanilang hakbang upang maiwasan ang posibleng krimen at mapanatili ang kaayusan sa lungsod.
Pinuntahan ng mga pulis ang iba’t ibang establisyimento gaya ng mga gasolinahan, tindahan, at iba pang negosyong pinansyal upang suriin ang mga umiiral na security measures. Layunin ng aktibidad na matiyak na may sapat na pag-iingat laban sa kriminalidad, lalo na sa mga oras na mas mataas ang panganib ng insidente.
Bukod sa inspeksyon, pinaalalahanan din ng kapulisan ang mga may-ari at empleyado ng mga negosyo na manatiling alerto at agad i-report sa awtoridad ang anumang kahina-hinalang kilos o pangyayari. Pinagtibay rin ang presensya ng pulis sa mga lugar na may aktibong operasyon sa gabi upang magsilbing panangga laban sa masasamang loob.
Ayon sa Urdaneta City Police Station, ang ganitong uri ng proaktibong operasyon ay mahalagang bahagi ng kanilang patuloy na kampanya sa crime prevention. Sa pamamagitan ng regular na pagbabantay at pakikipagtulungan ng komunidad, layunin ng kapulisan na masiguro ang kaligtasan ng mga negosyo at ng mamamayan ng Urdaneta City. |𝙞𝙛𝙢𝙣𝙚𝙬𝙨𝙙𝙖𝙜𝙪𝙥𝙖𝙣
