Davao City – Arestado ang pulo ka mga wanted persons atol sa gikasang Oplan Bulabog sa Davao City Police Office kun DCPO uban ang lain pang security forces kagahapon, adlawng Biyernes.
Base sa report sa DCPO, sikop ang giilang sila Joseph Dosdos ug Conception Pacifico tungod sa kasong illegal drugs, Jomar Yamit tungod sa kalapasan sa anti-smoking ordinance sa syudad, Edwin Banabana sa illegal discharge of firearms, Mary Joy Traya sa qualified theft, Orlando Ceballos, Jobert Abar, Joselito Lobertenos, ug Rode Manila tungod sa illegal gambling ug Marjon Lipalam sa credit card fraud diin ang maong mga wanted dunay pending court warrant.
Gawas sa mga wanted persons, lima ka mga drivers ang nadakpan ug na-impound ang ilang mga single nga mga motorsiklo tungod sa nagkadaiyang bayolasyon sa balaod trapiko.
Sumala ni Davao City Police Office (DCPO) Director Sr. Supt. Alexander Tagum nga sa 1,995 ka mga indibidwal nga gipaulawum sa proifiling, 192 kanila ang walay identification cards kun IDs.
Gipahigayon ang oplan bulabog alas 6 sa buntag kaniadtong biyernes sa Brgy. Mintal Tugbok, Buhangin, San Pedro, Talomo, Agdao, Bunawan, Toril ug Calinan dinhi sa syudad sa Davao.
RadyoMaN Renz Barbarona
