Davao City – Kampante si Atty. Rainier Madrid ang abogado ni kanhi Vice Mayor Paolo Duterte nga manubag gayod si Sen. Antonio ‘Sonny’ Trillanes IV sa ilang gipasang-at nga kasong libel.
Matud ni Madrid nga tataw ang mga ebidensya nga magduot kang Trillanes sa maong kaso.
Una na nga giingon ni Madrid nga gitambagan niini si kanhi bise-alkalde Pulong ug bayaw niini nga si Atty. Manases Carpio nga dili kinahanglan pang mutambong sa arraignment sa korte hinuon wala usab sila mitungha sa korte kaganinang buntag.
Ganina mitambong si Trillanes sa gipahigayong arraignment sa kasong 4 counts nga libelo batok kaniya sa Regional Trial Court (RTC) Branch 54 dinhi sa dakbayan.
Gani sa pagtambong sa senador, hugot gibarugan niini nga dili siya ‘guilty’ sa upat ka mga kasong libel nga gipasang-at batok kaniya.
Samtang base sa desisyon sa korte nga karong Marso 21, 2019 adunay mahinayon nga mediation diin magtagbo ang duha ka grupo nga adunay partisipasyon sa deliberasyon gani kung dili pa kini mahusay, malagmit muderetso na kini sa trial stage sa korte.
RadyoMaN Aimee Guinita
