Davao City – Gitambagan karon ni Akbayan Party List Representative Tom Villarin si Davao First District Represenative Paolo Duterte nga dili na lamang ipadayon ang planong molambigit sa iyang kaugalingon sa nagpadayong House speakership contest.
Matud ni Villarin, mas maayong itugyan na lamang una ang sensitibong posisyon ngadto nila ni Taguig Representative Alan Peter Cayateno ug Marinduque Representative Lord Velasco.
Gidason ni Villarin nga baguhan ug wala pa’y igong kasinatian sa national position ang presidential son, busa dili pa kini angayang mangandoy nga mahimong lider sa arang kagubot ug kasamok nga camara baja sa Kongreso.
Ang iyang background sa pagka Vice-Mayor sa siyudad sa Dabaw dili pa pupaigo nga basehan aron makonsidera na kini nga kuwalipikado sa katungdanan nga pagka-lider sa Kongreso ug usaka seryosong kandidato sa maong posisyon.
Segun ni Villarin, katungod sa matag kongresista ang pagdagan sa speakership apan posibleng maghatud usab kini sa negatibong impresyon sa katawhan kung pulos Duterte na lamang ang mogunit sa mga dagkung posisyon sa atong panggobyerno.
Gisalikway sa magbabalaud ang katarungan sa first-termer ug neophyte Davao solon nga ang panangbangi tali nila ni Cayetano ug Velasco maoy personal nga rason sa batan-ong Duterte nga magpapili kini sa powerful House post.
Magpahasa una si Duterte ug paaboton ang ikaduhang termino ingon man hatagan una og igong kagawasan ang mga sakop sa Kongreso nga makapili sa ilang lider nga gawasnon ug walay dikta sa Malacañang.
RadyoMaN Joel Viray
