Davao City- Subling giwaswasan karon ni Davao City Vice-Mayor Paolo ‘Pulong’ Duterte ang arch rival niini nga si Sen. Antonio Trillanes IV pinaagi sa pagtawag sa naulahi nga ‘ugok’ kun ‘idiot.’
Sa susamang news forum nga gitambongan usab ni Mayor Sara Duterte-Carpio, nagpahungaw pag-usab sa iyang kasagmuyo ang bise-alkalde gumikan sa mga pagpangdaut sa senador ngadto sa pamilyang Duterte.
Gipatin-aw ni Pulong nga pulos bakak ang pasangil sama sa gipamahayag ni customs fixer Mark Taguba mugna sa P6.4B shabu shipment gikan sa China, akusasyon nga siya miyembro sa gikaintapang Chinese criminal syndicate nga triad base sa usaka ‘dragon tattoo’ sa iyang likod nga bahin, mga pagkwestion sa iyang kapasidad-pinansiyal ug uban pang alegasyon.
Gibutyag usab sa bise-alkalde nga siya adunay pagduha-duha sa matuod nga motibo sa mga akusasyon uban sa pagtug-an nga aduna siyay nasagap nga intelligence report nga niadtong niaging tuig, adunay sekretong panagtagbo nahitabo sa US Embassy gitambongan sa usaka kanhi-presidente ug tulo ka mga negosyante alang sa destabilisasyon sa rehimeng Duterte.
