Davao City – Nabahin karon ang opinyon sa katawhan kalabutan sa paturagas ug patuyang nga paggamit sa internet ug social media sa mga kabatan-onan lakip ang mga millenials.
Sa RMN DXDC Davao morning primetime radio social commentary program nga ‘Straight to the Point,’ nigula nga dakung por ciento sa mga reactors ug texters gibati’g tumang kabalaka sa estado sa ilang mga anak gumikan sa pagyampungad niini sa social media sama sa Facebook ug ang pagbabad diha sa mga internet cafés aron magdula og online games nga usahay moabot sa punto nga di’ na nila kontrolado ang ilang pamensar sanglit addicted na kini sa maong mga kahilayan.
Lain pang kabalaka sa mga ginikanan mao ang posibleng dautang epekto ngadto sa kalawasan ug kasanihan sa mga batan-ong lulong na sa internet ug social media sanglit sagad sa mga na-involved makalimot na kini og kaon hinungdan sa pagkanaug sa ilang grado sa tulunghaan.
Hinoon, adunay uban wala nabalaka gumikan samtang bata pa nadisiplina na nila ug maayo ang ilang mga anak sama sa pag-limite kun pagtagana ug limitadong oras sa paggamit sa internet o bin ba kaha magdula, gani ginalimitahan sa ubang respondents ang ilang mga ginsakpan sa pamilya pinaagi sa pagtagana ug ispesipikong adlaw ug oras alang sa paggamit niini.
Gipanghinaut usab sa mabagang duot sa katawhan nga dili lamang mga ginikanan ang angay mo-panton kun mo-disiplina sa mga internet users apan apil usab ang mga magtutudlo gumikan sa mahinungdanong papel nga ilang gihuptan diha sa matarong nga pagmatuto sa mga kabatan-onan ug sa mga mosunod nga mga kaliwatan.
RadyoMaN Jason Amisola
