Ginsurprisa sang Punong Barangay sang Barangay San Antonio, Barotac Viejo ang iya nobya matapos nag-propose ini samtang ginahiwat ang basketball tournament sa ila barangay angut sa ila kapiyestahan subong nga Disyembre.
Suno kay Punong Barangay Reyjane Basinang, 33 anyos nga nadesisyunan niya nga surprisahon ang iya nobya nga si Rachelle Ann Canto, 30 anyos bangud masami ini nagapasingit humalin sang magpauli halin sa Taiwan sang bulan sang Agosto.
Bangud sini, iya ginkunsabo ang iya mga barangay kagawad kag mga players para sa iya wedding proposal.
Antis magsugod ang ila basketball tournament sang sabado sang gab-i, natabu ang wala ginalauman nga wedding proposal sang iya nobya nga wala man nagpangduha-duha sa paghatag sa iya sang matam-is nga huo.
Nahibaluan nga 17 anyos na nga magnobyahanay sanday basinang kag canto humalin sang naga-eskuwela pa sila sa high school.
Natalana ang ila kasal sa Enero 20, 2018.
