(Photo by DIVINA SUSON)
Gi-pailawom na sa ‘localized containment’ o lockdown ang Purok 7, sa Barangay Linangkayan, sa lungsod sa Naawan, Misamis Oriental sugod niadtong Sabado (Hulyo 11).
Kini human mag-positibo sa COVID-19 si Vice Mayor Jaime Roa, kinsa ang panimalay nahimutang sa maong purok. Si Roa and acting mayor karon sa lungsod.
Matud pa ni Captain Dennis Dano, hepe sa Naawan Municipal Police Station, kapin sa usa ka gatus ka mga pamilya ang naa sulod sa maong purok.
Gisarado ang duha ka mga dalan pasulod dito ug usa lang ang gihimong entry ug exit point.
Ang local government unit (LGU) maoy mohatag og pagkaon sa mga residente sulod sa 14 ka adlaw apan kung aduna silay mga paryente sa gawas sa purok nga bu-ot mohatag kanila og dugang pagkaon, mahimo nilang ibilin sa checkpoint ug kini kuhaon sa hatagan.
Gikumpirma ni Municipal Health Officer Dr. Gwendelyn Labastilla, nasuta nga infected ang 80 anyos nga bise mayor, kinsa usa usab ka medical doctor, human kini mi-sumiter sa iyang kaugalingon alang sa swabbing niadtong Hulyo 11.
Nag-reactive o positibo sa rapid diagnostic test ang tulo ka mga empleyado sa Municipal Health Unit, kinsa adunay direkta nga exposure sa bise mayor, hinungdan nga dihang gi-swab ang tulo ka mga empleyado, mi-apil usab kini.
Negatibo sa RT-PCR test ang tulo ka mga health workers apan si Roa ang nag-positibo.
Miingon si Labastilla, walay gibati o asymptomatic si Roa apan kinahanglan kining dad-on sa Northern Mindanao Medical Center (NMMC) sa Cagayan de Oro City aron siguradong ma-monitor og insakto tungod sa iyang pangidaron. (Divina M. Suson, July 14)
