Davao City – Patay ang usa ka street level target nga drug pusher human nga misukol sa kapolisan sa Sta Ana atol sa ilang gilusad nga buy bust operation uban ang PDEA-XI alas 11:19 sa kagabhion sa Purok 3 Isla Verde Brgy 23-C Quezon Boulevard syudad sa Davao.
Base sa report gikan sa Sta Ana Pnp ang suspek mao si Carlo Cabahug Igot, 23 anyos ulitawo, residente sa nahisgutang lugar.
Sa imbestigasyon sa kapolisan, gikasa ang buy bust operation sa usa ka poseur buyer nga mao si Police Officer 2 Cameros ug positibong napalitan og usa ka sachet sa shabu bugti sa 1,000.00 nga buy bust money.
Matod pa, sa dihang gidakop na unta ang suspek kalit kini nihulbot sa iyang armas hinungdan nga napusilan ang suspetsado.
Daling gidala ang suspek sa Southern Philippines Medical Center apan gideklara na kining dead on arrival.
Narekober sa crime scene ang usa ka .38 revolver nga dunay upat ka bala, tulo ka basiyo sa 9mm. caliber ug usa ka kutsilyo.
Nakuha usab gikan sa suspek ang upat ka elongated sachet ug lain pang usa ka big size rectangular sachet nga gituohang shabu nga gibana-banaang mokantidad og 35,000.00 pesos lakip nakuha ang ang buy bust money.
Base sa record gikan sa Sta Ana PNP, subay sa report gikan sa barangay nga gipuy-an sa suspek nasayran nga nalambigit kini sa kasong pagpanulis ug pagpamaligya og shabu.
Ang patayng lawas sa suspek anaa pa sa morgue sa Southern Philippine Medical Center samtang ang mga drug items anaa gikustodiya sa buhatan sa Sta Ana Pnp.
RadyoMaN Don Pulayao
