Davao City- Patay diha-diha ang usa ka drug pusher human nakigpinusilay sa mga sakop sa Buhangin Police Station sa buy-bust operation sa kilometer 15, Sta.Cruz, Brgy. Indangan, Buhangin District , syudad sa Davao, alas 12:00 sa gabii.
Nadala ug gitambalan pa sa Southern Philippines Medical Center (SPMC) si Bryan Cuamag, hamtong ang pangidaron, ug residente sa Manay, Panabo City, Davao Del Norte apan gideklara gihapon nga nakabsan sa kinabuhi ang suspek gumikan sa igo sa dughan.
Matud ni Police Major Estrello Ramiso, Buhangin Police Station Chief, kalit namusil si Cuamag sa kapolisan dihang iyang nasayran nga awtoridad ang iyang gikatransak.
Na-recover sa possession sa suspek ang upat ka sachet sa shabu, cellphone, .38 caliber ug 500 pesos nga marked money.
Nasayran nga kanhi dinakpan sa Sta. Ana Police Station si Cuamag gumikan gihapon sa pagpayuhot sa illegal nga droga apan nakagawas sa prisohan human nag-plea bargaining sa korte apan mibalik kini sa pagpamaligya og droga.
Gawas sa kalapasan sa balaod kontra sa illegal nga droga ang suspek, aduna sa’y kaso nga kawat sa area of responsibility sa Presinto Uno sa nakalabay’ng katuigan.
RadyoMaN Joel Viray
