Davao City – Patay ang usa ka gituohang drug pusher human naka angkon og duha ka samad-pinusilan sa ulo nga bahin human neutralisa sa Sta. Ana PNP atol sa gilusad nga buy-bust operation alas 7:45 kagabie sa may Del Pilar St. Brgy. 15-B Bo. Obrero, siyudad sa Davao.
Base sa report gikan sa Sta. Ana PNP, naila ang suspect nga si Johnny Acogido, 40 anyos, nagpuyo sa De Junio St., Sun Valley, NAIA Pasay City base sa nakitang lisensiya niini ug kasamtangang nagpuyo sa Isla Verde Brgy. 23-C ning siyudad.
Matud pa sa dihang gikasa ang buy-bust operation, malampuson napalitan ang suspect sa usa ka sachet nga gituohang shabu ug sa dihang nagpaila nga police ang gikatransak niini kalit kining mihulbot sa iyang armas dayon pusil tumong kang Po3 Basirul igo sa wala’ng bukton nga bahin ug gilayon gibalsan kini isip depensa sa maong pulis.
Gitabang ug gidala sa kapolisan sa Southern Philippines Medical Center (SPMC) ang suspetsado apan gideklara nga dead on arrival pinaagi ni Dr. Mike Tillo, attending physician, samtang ang Police nga si Po3 Basirul ang anaa pa gitambalan sa SPMC.
Samtang ang SOCO team nagpahigayon og parallel investigation sa pagpanguna ni Police Chief Engineer Inspector Armando Galigo ngadto sa crime scene area diin nakita ang usa ka unit sa .38 caliber revolver, duha ka bala, usa ka basiyo, duha ka fired bullet nga gituohang iya sa caliber 9mm.
Narekober usab gikan sa suspect ang lima ka pakete nga gituohang shabu, usa ka color brown pouch lakip ang P500 nga buy-bust money.
Ang patay’ng lawas ni Acogido anaa pa gihaya sa morgue sa SPMC samtang ang mga drug items nga nakompiska gikustudiya na sa Sta. Ana PNP.
RadyoMaN Don Pulayao
