Davao City – Arestado sa kapolisan sa Sta. Ana PNP ang usa ka tigpayuhot og iligal nga droga human nakuhaan ug shabu nga mukantidad og P5,000 atol sa gilusad nga Joint Anti-Illigal Drug Operation natigayon alas-7:10 kagabie sa likod sa Piapi Boulevard Public Market nahitmutang sa Brgy. 22-C siyudad sa Davao.
Subay sa report sa Sta. Ana PNP, naila ang dinakpan nga usa ka Rene Betarmos alyas Renren, 30-anyos, ulitawo, residente sa Blk. 27, Lot 3, Catalunan Grande ning siyudad.
Malampusong napalitan og shabu ang suspetsado diin narekober ang sa kapolisan ang tulo ka mga pakete sa gituohang shabu lakip ang mga illigal drug paraphernalia.
Sumala pa nga si Betarmos gikunsidera sa Sta. Ana PNP nga street level pusher kinsa balhog na karon sa ilang buhatan samtang gikatakdang ipasaka sa adlaw’ng Lunes ang kasong kalapasan sa Akta Republika 9165 kun Comprehensive Dangerous Drugs Act of 2002 ngadto sa korte.
Sa datos sa Sta. Ana PNP, kapin 100 na ka mga drug pusher ang nadakpan ug napasakahan na og kaso ug 13 na ang naneutralisa sa kapolisan sukad milingkod si Police Chief Inspector Michael Uyanguren isip Station Commander sa Sta. Ana Police Station.
RadyoMaN Don Pulayao
