*El maga pulis del Sangali Police Station ya encabesa si Chief Insp. Chester Natividad ya puede ya recobri conel 9mm pistola y un cell phone ta dueña si Alex Manalo quien ya mata consu cuñada na diila residencia na Bunguiao del pasao maga dia.*
*El recobrida del pusil y cell phone ya bene despues mismo si Manalo finalmente ya admiti que ele el persona quien ya sopla de tiro consu cuñada si Angelica Arquiza, 18, dalaguita quien aquel hora ta durmi adentro del diila casa junto consu aguela y hermano na Sitio Waray-Waray, Bunguiao del pecha 4 en este mes.*
*Na entrevista con Natividad ya habla le despues ya man inquest na ficalia del Sabado con Manalo por el caso de murder, derepente este ya “canta” hablando que ya esconde le consu pusil y cell phone afuera del diila casa na barrioi de Dulian que mas de un quilometro solamente el distancia desde na Sitio Waray-Waray, Bunguiao, despues le de mata con su cuñada.*
*Dayun tambien ya forma grupo si Natividad y ya apunta para na Dulian donde alya sila ya encontra con el 9mm pistola tiene 10 maga bala y el cell phone del tata di Manalo pero ele el ta usa con este.*
*Asegun antede mata si Manalo consu cuñada pirmi ya este ta dale amenaso consu esposa que ay dale le grande problema nunca puede ulbida.*
*El pulis ya habla dinero el rason si porque ya mata si Manalo consu cuñada porcausa su esposa quien ta trabaha apuera gende ta imbya conele cene y envez consu hermana que es el victima amo conquien le ta imbia porcausa ta derotia lang asegun si Alex con el maga dinero. *
