Gikatakda karong bulan sa Abril ang qualifying examination sa labing dako nga college scholarship program sa probinsya sa Sarangani gitawag nga Paaral Para sa Sarangan Scholarship Program kon P.P.S.S. alang sa school year 2019 to 2020.
Tungod sa kini nga programa nga gipondohan matag tuig sa Sulong Karunungan program ni Governor Steve Chiongbian Solon, ubay-ubay na nga mga kabataang Sarangan ang nahimong doctor, engineer, accountant, teacher og mga professional. Mga kabataan nga naningkamot makatapos sa pag-eskwela taliwala sa kalisod sa ilang mga pamilya.
Segun ni Maam Glenda RevaƱo, ang program manager, nahan-ay na sa iyang buhatan ang schedule sa eksaminasyon sa ikatulong semana sa Abril sa matag munisipyo sa Sarangani Province. Abli kini sa tanang incoming first year college student, kadtong mutungha sa unang ang-ang sa kolehiyo nga nakahuman sa senior high school.
Mas gipadak-an pa ni Governor Solon og sa Sangguniang Panlalawigan ang pondo sa PPSS karong abri sa klase. Gikan sa P5 hangtud P7 Milyon ka pesos nanglabay nga mga tuig ang nahimo na kini karong P9 Milyon ka pesos. Kadtong masulod sa full scholarship ang makadawat kinig Tres Mil ka pesos (P3k) matag bulan isip monthly living subsidy, P2,500 para sa allowance sa libro matag semester, og P500 matag bulan nga transportation allowance. Samtang ang masulod sa partial-counterparting scholarship ang makadawat matag bulan og P1,500 hangtud P2,000 depende sa eskwelahan nga masudlan.
