QUEEN MAJESTY SALVACION LEGASPI UG 23 KA MGA KAUBAN, LAKIP USA KA ANNOUNCER SA RADYO, GIDAKOP SA PULIS TUNGOD SA PAG-TAKE OVER SA USA KA TUNGHAAN SA DITUCALAN

185

Tungod kay ilegal ang ilang gibuhat, gidakop sa kapulisan si Salvacion Legaspi, kinsa nagpailang “queen majesty” kinsa miangkon nga tag-iya sa Pilipinas, pasado alas-4:00 sa hapon niadtong Sabado, Disyembre 26.
 
Kini human nga walay pagtugot nga misulod sa Francisca Paradela Legazpi Memorial School sa Barangay Ditucalan, dala ang ilang mga gamit sama sa unlan, habol, rice cooker, laptop ug mga dagkung bag nga gisudlan sa ilang mga personal nga gamit ug mga sinina.  
Matud pa ni Police Major Rixell Torayno, officer-in-charge sa Iligan City Police Station (ICPS) 2 sa Barangay Maria Cristina, nga unang na-report, alas-10:00 sa buntag, ngadto sa iyang buhatan ang pagsulod sa grupo sa 70 anyos nga si Legaspi, sa nasangpit nga tunghaan nga walay pagtugot sa hintungdan.  
Dala sa iyang grupo ang mga, matud pa, dokumento nga pagpamatuod nga sila ang tag-iya sa lugar.  
Unang mihimo sa negosasyon nga mobiya sa lugar ang mga opisyal sa barangay ug pamunuan sa tunghaan, apan wala kini sila gipaminaw hinungdan nga nanawag na og usa ka team sa Special Weapons and tactics (SWAP) sa Iligan City Police Office (ICPO) aron maoy mo-abog kanila.  
Miingon si Torayno nga ang pamilya ni Legaspi ang nag-donar sa yuta nga gitukuran sa maong eskwelahan apan ang katunga niini, gibayran sa kagamhanang lokal.  
“Dunay mga documents nga mao daw to nagpamatuod nga sila ang tag-iya sa tibook Pilipinas, Iligan City in particular, ilaha gyud nang gi-angkon,” pamahayag ni Torayno sa interview sa media.  
Kauban ni Legaspi nga gidakop ang 14 ka mga lalaki ug siyam ka mga babaye.  

Usa kanila nailang announcer sa lokal nga estasyon sa radyo sa Iligan nga si Rolando Flores o mas naila nga Dodong Flores.  


Gipasaka sa pulis, kinsa nagsilbing nominal complainant tungod kay mitindog lang nga saksi ang principal sa eskwelahan ug ang kapitan sa Ditucalan, ang mga kaso nga illegal trespassing ug resistance and disobedience to persons in authority.  

“Mihangyo ang mga babayeng kauban (ni Legaspi) nga dili lang posasan ang ilang ‘queen’ pero mga wild man gud. Ilang bunluton ang posas dayun ilabay. Ilang gipangsipa ang mga babaye nga pulis. Duha sila ka mga babaye ang gipasakaan og resistance and disobedience to persons in authority,” asoy ni Torayno.  

Ang grupo ni Legaspi gitawag og Kingdom Filipina Hacienda-Autocratic Sovereign Monarchy nga ang headquarters naa nahimutang sa Barangay Palao, dakbayan sa Iligan.  
Royal Castle ang ilang tawag sa ilang headquarters nga adunay ilang kaugalingong bangko kwarta nga ang currency gitawag og ‘euro’.

  Miingon si Torayno nga misumbong kaniya ang principal sa FPLMS nga gipadad-an na siya ni Salvacion og sulat aron ‘ipa-vacate’ o bakantehan ang maong tunghaan kay ilaha na kining bawi-on.  
Niadtong nakalabay’ng tuig, nagsulat usab si Legaspi kang Mayor Celso Regencia nga ipapahawa sa city hall kay siya ang mopuli isip rayna apan wala kini gipaminaw.  
Sa mga nakalabay’ng interview sa media kang Legaspi, miingon kini nga aduna siyay gihuptan nga mga dokumento pagpamatuod nga ang iyang pamilya maoy tag-iya sa Pilipinas ug ang Iligan City ang ilang gingharian.  
Isip sumusunod, siya ang gideklara, matud pa, nga rayna sa maong gingharian nga adunay kaugalingong bangko, kwarta ug korte.  
Dili sila motoo sa gobyerno, sa korte ug sa kwarta sa Pilipinas apan gamit ang Philippine peso, nangandam na ang grupo ni Legaspi alang sa ilang piyansa ngadto sa Regional Trial Court sa Iligan, nga una nilang giingong dili nila toohan. (Divina M. Suson, December 29)




Facebook Comments