Davao City – Dakung hinungdan sa maayong paghulma sa kinabuhi sa kabataan ang paggahin og taas nga oras sa mga ginikanan ngadto sa ilang mga anak nga bisan og unsa ka busy, aduna gyo’y panahon alang kanila.
Segun ni Davao City First District Councilor Joanne Bonguyan-Quilos, bisa’g unsa ka busy niya sa trabaho sa Konseho, dili gayod niya kawangon ang paghatag og oras sa duha niya ka mga anak.
Sa linghod nga pangidaron daghan kaayo silang mapunit nga dili maayong pagtulon-an gikan sa mga butang nga ilang gipang-explore sama sa gadgets, pagkuyog sa mga barkada ug daghan pang uban.
Kung dili magiyahan og sakto sa mga ginikanan ang ilang mga anak tungod walay panahon, ang nasangpit nga mga butang maoy magtudlo kanila sa paghimo og dautan nga buhat sa atong katilingban.
Dugang ni Quilos, mahinungdanon kaayo alang kaniya nga ma-bonding ang duha niya ka mga anak kay dinha rang dapita iyang mapabati ang iyang gugma ug maayong pagpanudlo sa iyang kabataan.
Dili buot sa konsehala nga masusama sa ubang mga bata ang iyang mga anak nga nasugamak sa buhat nga dili maayo sama sa droga, krimen ug suicide tungod lang sa pagkamapasagaron sa ubang mga ginikanan.
Kung unsay madangatan sa mga kabataan inig kadako nila, mubalik ra sa mga ginikanan ang mga pagmahay ug pagtulisok kung wala nila seryosoha ang pagmatuto ug pagpadaku sa ilang mga kabataan.
Kung mapadaku subay sa maayong pagpanudlo sa mga ginikanan ang mga anak, magbaton kini sila og produktibong kinabuhi imbes nga maghatag na hinoon og labad sa gobyerno ug sa sosyedad.
Tambag usab ni Quilos ngadto sa mga ginikanan nga dili magdinalu og oras sa ilang mga anak kung buot nilang ma-establisar ang lig-on nga relasyon tali sa ilang mga anak aron sa ingon, dili mahayon pag-abot unya sa tukmang panahon.
RadyoMaN Joel Viray
