Davao City – Hingpit na nadawat sa pamilyang Evangelista ang kamatayon sa anak ni Kapitan Romeo ‘Bokay’ Evangelista nga si Dave Evangelista subay sa gipagula nga imbestigasyon sa Sta. Ana PNP.
Kini human nahinabi sa RMN Davao News Team si Police Officer 2 Ranel Aredidon, traffic investigator sa Sta. Ana PNP, nga dili na matud pa mupasaka og kaso batok sa driver nga nailang usa ka Zaren Reigh Blanca Melgazo.
Gidugang ni Aredidon nga walay drag race nga nahitabo atol sa maong insidente base sa gihimong imbestigasyon sa kapolisan nga kusog ang dagan hinungdan nga wala na makontrola sa driver ug miresulta sa pagkabangga ngadto sa railing island didto sa dalan R. Castillo Agdao ning dakbayan sa Davao.
Gikanayon ni Aredidon bisan kun dili na pursegido mupasaka og kaso ang pamilyang Evangelista, gi-isyuhan ang driver nga si Melgoza og Temporary Operating Permits (TOP) ug gikompiska ang iyang lisensiya ug giturn-over sa Land Transportation Office (LTO).
Sa karon ang driver nga si Zaren Reigh Melgazo padayon pa gi-atiman ug nagpatambal sa Southern Philippines Medical Center (SPMC).
RadyoMaN Don Pulayao
