Dipolog City-Subay sa pag-obserbar sa Rabies Awareness Month ning bulan sa Marso, gihingusgan karon sa mga hintungdang ahensya sa gobyerno nga magbantay aron dili mapaakan sa iro ug iring diin maoy nagdala sa rabies.
Kini ang gipamahayag sa mga kadagkuan sa rehiyonal nga buhatan sa Department of Agriculture (DA) ug Department of Health (DOH) sa rehiyon 9.
Base sa ilang datus, gibutyag ni Mr. Nieto Fernandez sa DOH nga gikan sa tuig 2014 hangtud na sa 3rd quarter sa tuig 2018, adunay 161,772 animal bite cases sa rehiyon 9 ang natala sa ilang buhatan, diin ang Zamboanga del Norte mitala ug 37,873 ka kaso sa animal bites.
Samtang si Dr. Marie France Jalao, ang Focal Person sa Rabies Program sa rehiyonal nga buhatan sa DA ang nagkanayon nga sa tuig 2018 dinhi sa Zamboanga Peninsula adunay 272,178 ang populasyon sa mga iro, ug 113,561 o 44.55% ang nabakunahan niini sa rabies.
Dinhi sa Zamboanga del Norte, adunay 72,331 ang dog population samtang 38,999 o 53.92% ang nabakunahan niini.
Niini, gipahalipayan ni Dr. Jalao ang Provincial Veterinary Office sa pagpangulo ni Dr. Elmer Atienza sanglit mao kini ang nag-una sa tibuok rehiyon sa hingpit nga pagpatuman sa Rabies Program.
Gipahibalo usab ni Dr. Jalao nga ang 2019 Target for Rabies Free Area dinhi sa rehiyon mao ang dakbayan sa Dipolog, lungsod sa Polanco ug Sergio Osmeña dinhi sa Zamboanga del Norte. Samtang ang lungsod sa Mahayag usab alang na sa Zamboanga del Sur, ug ang lungsod sa Olutanga, Mabuhay ug Talusan alang na sa Zamboanga Sibugay.
Nasayran nga ang rabies gikonsiderar nga usa ka sakit nga napasagdahan diin 100% fatal apan 100% preventable.
Kung napaakan sa iro, kinahanglan hiktan o isulod kini sa kurungan ug oberbahan sulod sa 14 ka adlaw. Dili patyon ang maong iro.
Kung namatay an giro sulod sa 14 ka adlaw, kinahanglan mokunsulta sa veterinarian alang na sa tukmang pagsumite sa specimen alang nasa diagnosis.
Ingon man, dalhon ang specimen ngadto sa Regional Animal Deisease and Diagnostic Laboratory sa Tumaga, dakbayan sa Zamboanga. (PIC-mbmontederamos)
