General Santos City–Nagpahimangno ang buhatan sa Regional Anti-Cyber Crime Unit (RACO)-12 kalabutan sa risgo sa paggamit sa uso nga face app kung asa mao karon ang gikabu-angan sa mga tawo sa Social media hilabina sa facebook sa pag-usab-usab sa ilang mga dagway.
Matud pa ni Police Major Leo Dofiles Assistant Chief sa maong buhatan nga dugay nang migawas ang face app ug misikat lamang kini niadtong milabay nga tuig diin dunay mga security advisory kabahin sa bahad sa maong application. Usa niini ang security risk nga basin gamiton ang mga hulagway sa dili maayo.
Saysay pa sa opisyal nga ang mga hulagway nga gina-upload sa ilahang servers ilaha matud pa kining gina-save ug gina-erase butang nga wala gituohan sa opisyal tungod kay sa pag-install pa lang sa maong app duna na kini terms and condition nga miuyon ang tawo nga ma-access ang iyang personal data ug impormasyon.
Gipasabot usab ni Dofiles nga ang delikado niini nga posibleng magamit ang mga nakuhang personal nga impormasyon sa paghimo ug mga fake accounts ug uban pang krimen pinaagi sa online.
Gitin-aw sa opisyal nga wala ginadid-an sa ilang buhatan ang mga tawo nga mogamit sa maong app ang ilaha lamang mapahibalo nga dunay risgo ug dili sila mabasol sa katawhan kon ugaling man dunay mabiktima pag-abot sa panahon. (RV)
