Ramon Magsaysay, Zamboanga del Sur – Karong adlawa gikatakdang ipaila-lom na sa inquest proceedings ang usa ka lalaki nga nakuha-an og armas ug mga bala atol sa gihimo nga pagpangronda sa otoridad sa Purok 1 ug Purok 3 sa Brgy. Sto. Rosario, Ramon Magsaysay, Zamboanga del Sur alas 4:00 kagahapon sa buntag.
Nag-ipon og pwersa ang tropa sa Ramon Magsaysay PNP, Zamboanga del Sur Police Intelligence Battalion, Regional Intelligence Division-9, Regional Drug Enforcement Unit, Zamboanga del Sur Provincial Drug Enforcement Unit, Task Force TUGIS, Regional Mobile Force Battalon 9-2nd Manuevering Company ,1st Provincial Mobile Force Company ug gihimo ang simultaneous raid sa balay sa upat ka target nga si Emmanuel Acosta a.k.a “BOBOY”, Roger Acosta a.k.a. “GER”, Melvin Servado a.k.a. “MEL”, ug Gerald Ugmad.
Armado ang kapulisan sa daghanang SEARCH WARRANT batok sa mga suspek sa mga kasong pagpayuhot sa illegal nga droga ug pagbaton sa ihalas nga armas nga gipagawas ni Judge CAROL MORALES, sa 9th Judicial Region, 1st MUNICIPAL TRIAL COURT, Tambulig, Zamboanga del Sur nga mao usab ang Acting Presiding Judge sa 10th MCTC sa RAMON MAGSAYSAY-MIDSALIP-SOMINOT niining probinsya.
Wala masapni ang suspek nga si Emmanuel Acosta nga target sa Search Warrant apan nahipos sa iyang mismong balay ang upat ka bala sa 45 nga pistola, usa ka body armor bullet Vest ug usa ka Granada.
Nadakpan sa maong operasyon si Melvin Servado og nakuha sa iyang posisyon ang Caliber 22 diin mag-atubang sa kasong paglapas sa akta republika 10591 “Comprehensive Firearms and Ammunition Regulation Act”.
