RMN Laoag – Nakasagana iti nagduduma nga ili ti Ilocos Norte ti Rainwater Harvesting Tank a pangontra ti epekto ti El Niño iti pagilian.
Ti Rainwater Harvester ket dakkel a tulong a mangkolekta ti danum manipud iti tudo. Itay laeng kallabes, adda ti mapatto-pattok a panagtudo iti probinsia.
Iti met ili ti Piddig, saan a parikot kadakuada ti tiempo ti tikag gapu ta naaddaanda ti Water Dam a masarakan iti barangay Abucay. Kabaelanna daytoy a makagun-od iti umabot pito a million a metro kubiko ti danum.
Inaramid daytoy ti local a gobyerno iti Piddig babaen iti panagtitimpuyog iti nagduduma nga ahensya. Nu tiempo ti tudo, agkolkolekta daytoy iti danum ken maparuk-atan met daytoy iti tiempo ti tikag.
Gapu kadaytoy, saan unay a marigatan dagiti agtaltalon iti probinsia, malaksid kadagiti agkalkalap nangnangruna dagiti addaan ti piskaria iti nagduduma nga ili.
Bernard Ver, RMN News
