Davao City – Dakong kalamboan ang nahitabo karon sa mga taga Brgy. Binaton human mahitabo ang mangilngig nga massacre sa Sitio Rano, Brgy. Binaton, Digos City human sa 30 ka tuig ang milabay.
Gisaysay ni Digos City Mayor Joseph Peñas nga sa milabay’ng tuig, mihangyo og tarong nga dalan ang mga lumulupyo sa maong lugar ilabi na nga dugay na naninguha ang mga taga Sitio nga ablihan ang dalan sa Rano nga kinahanglan pa mutabok og duha ka sapa gikan sa sentro sa Brgy. Binaton.
Gani misaad kini atol sa ika-30 ka tuig nga Komemorasyon sa Rano Massacre nga sugdan na ang maong gitinguhang kalsada.
Dugang ni Peñas nga bisan wala pa hingpit nakab-ot sa mga kabanay sa namatay ang hustisya, wala sila gipasagdaan sa lokal nga panggamhanan gani kanunay ang mga programa sa gobyerno nga subay sa pagkab-ot sa kahapsay ug kalinaw.
Gani, nahimong pamaagi ang Rano Massacre sa pagsaka sa pagpakabana sa mga lumad aron mabatukan ang kalihukan sa New People’s Army (NPA).
Samtang sa iyang solidarity message, gipaniguro ni AFP Chief Lt. Gen. Felimon Santos Jr. nga kanunay andam 24/7 ang militar nga mutabang sa mga lumad sa maong lugar alang sa pagkab-ot sa hingpit nga kalinaw ingon man usab sa kalamboan sa maong lugar.
“Manalig kayo sa ating pagtutulungan para ating makamtan ang ating layunin na magkaron ng walang hanggang kapayapaan at mananatili ang pag-unlad,” segun niini.
Kahinumdoman nga niadtong June 24, 1989 way kaluoy nga girakrakan ug girapido ang 39 ka mga membro lakip ang mga pastor ug gagamay’ng bata sa United Church of Christ Philippines (UCCP) sa Sitio Rano Brgy. Binaton, Digos City atol sa ilang religious activity.
Kini human matud pa nasuko ang mga membro sa NPA gumikan wala na nila suportahi ang maong grupo pinaagi sa pagpanghatag og kwarta, pagkaon ug uban pa.
RadyoMaN Jason Amisola
