SEOUL, South Korea — Nauwi sa totohanang rape ang role-playing na sinimulan ng dalawang lalaki sa chat.
Noong Agosto nakaraang taon nang mag-message sa isang chat app ang lalaking kinilalang si “A” na nagpanggap na 35-anyos na babae, ayon sa ulat ng The Korea Herald, Abril 21.
“I want to be raped. Looking for a male role play partner,” saad nito.
Nang magapakita ng interes ang lalaking kinilala lamang bilang “B”, nagbigay si A ng address ng tinitirahan niya raw sa Sejong.
Pinuntahan ni B ang address, pinasok ang bahay, at ginahasa ang babaeng sa huli’y napag-alamang walang koneksyon kay A o maging kay B.
Inimbestigahan ng pulisya ang dalawang lalaki makaraang makatanggap ng reklamo.
Batay sa pulisya, sinabi ni A na gusto niya lang pag-tripan si B at hindi niya inasahang mauuwi ito sa aktuwal na panggagahasa.
Iginiit naman ni B na naloko at nagamit lamang din siya, at hindi niya ginusto ang nangyari.
