TACLOBAN CITY – Ha pinag usa nga pwersa han mga operatiba han Criminal Invistigation and Detection Group o kun CIDG han Western Samar, Camarines Sur Provincial Police Office nadakop ngan naaresto na an number 1 Most wanted person nga may kaso nga rape ha Babatngon Leyte nga nagtatago la ngayan ha Naga City.
Ginkilala an suspek nga Jojie San Miguel y Canete, 25 anyos ngan anay residente ha Brgy. San Ricardo ha bungto han Babatngon, Leyte.
Sumala han report, alas 7kagab-i han matunugan han mga kapulisan nga an suspek in aadto ha Naga City People’s Mall ha Brgy. Igualdad. Dayon nga naaresto an suspek ha iginsalawad nga warrant of arrest nga igingawas ni Judge Lauro Castillo Jr. Han Regional Trial Court branch 7 dinhi ha Tacloban.
Nabaruan han pulisya nga temporaryo nga nagtatago an suspek ngan naukoy ha Brgy. Cararayan, Naga City antis madakop han operatiba ha market site han mao nga syudad.
An nasabi nga kaso in “no bail recommended” ngan ha pagka yana, aada na ha kustodiya han CIDG CamSur an suspek samtang nakikipag koordinar na an mao nga buhatan para maibiyahe an suspek tipakanhi ha Leyte para umatubang ha korte.
