Davao City – Wala magtoo ang mga ginsakpan sa Sasa PNP lakip na ang mga kaubanang piniriso nga maghi-kog sa comfort room sulod sa selda ang rape suspect nga si Lemar Cano alas- 3:45 Domingo sa kadlawon.
Matud sa hepe sa Sasa PNP nga si Police Chief Inspector Ruben Libera, naglusad og ‘Greyhound Operation’ ang ilang istasyon sa selda aron limpyo kini gikan sa mga kontrabandos nga posibling gipalusot sa mga inmates.
Gumikan kay sa bulan sa Enero sagad masinati ang pag-ulan ug aron dili ma-umod sa tulo ang mga piniriso, usa na ka semana gipahigayon ang internal operations.
Segun ni Libera, ang matag preso gitahasan nga maglimpyo ug magplastar sa ilang mga gamit aron haruhay ang ilang kahimtang bisan og gamay lang ang ilang selda.
Ang mga piniriso niadtong higayona gidala sa radio room aron mabantayan ug walay maka-eskapo kanila gawas kang Lemar nga nag-inusara naglimpyo sa gipadlakan nga sa selda.
Human sa pila ka minute, usaka Police Officer 1 misusi kang Lemar sa selda apan bisan og makapila gisampit ang pangalan sa suspetsado, wala matud pa’y misanong maong ilang gisulod ang selda.
Sumala ni Libera nga ila na lamang nakaplagan nga nagbitay na sulod sa CR si Lemar apan hinay na ang pulso hinungdan dali nilang gidala sa SPMC ang suspek apan gideklara kini nga patay na.
Gilayon nanawag si Libera kang DCPO Chief Alexander Director Tagum aron ipahibawo ang nahitabo sa rape suspect aron hi-moon ang parallel investigation sa pagpanguna ni Police Chief Inspector Tarungoy hepe sa IDMB.
Migula sa imbistigasyon nga aduna na’y timailhan sa nilihokan ni Lemar nga maghunos kini sa iyang kinabuhi gumikan sa nahitabo sa sais anyos nga batang babaye kinsa gilugos ug gipatay niini petsa 27 sa Disyembre sa miaging tuig.
Migula sa pagpanukiduki nga miangkon si Lemar nga siya gayud maoy nagbuhat sa mangilngig nga krimen ug kanunay na lamang kini mag-inusara ug maglahi sulod sa selda, sa laktod gibati’g tumang pagmahay sa iyang nahimong salaud.
Tungod sa maong sirkumstansiya, gibarugan ni Libera nga walay ‘foul play’ sa kamatayon ni Lemar Cano inay kabubut-on kadto niya nga maghikog-patay.
Dugang sa hepe, naghulat na lamang unta sila niadtong tungora sa commitment order gikan sa korte aron mabalhin na sa Maa City Jail si Lemar apan wala na kini nahitabo human nagpakamatay.
RadyoMaN Joel Viray
