Davao City – Nagpahigayon karon og ‘rapid needs assessment’ ang probinsya sa Davao Oriental human sa kadaut resulta sa dakong pagbaha ingon man pagdahili sa yuta dala sa kusog nga pag-ulan sa lugar.
Sa pakighinabi sa DXDC RMN Davao kang Leslie Francisco, spokesperson sa Office of the Civil Defense (OCD)-XI, gibutyag niini nga libuan ka pamilya ang apektado sa tibuok probinsya tungod sa kalamidad diin dakong kadaut ang gibilin niini sa agrikultura, livestock, infrastructure ingon man nagubang mga kabalayan.
Matud pa ni Francisco nga kagahapong adlawa, Enero 22, 2019 nagpahigayon og evacuation ang mga residente sa Brgy. San Isidro sa Manay. Aduna usay mga evacuation centers sa Caraga ug Tarragona, Davao Oriental alang sa mga residente nga apektado.
Samtang gibutyag sa tigpamaba sa OCD-XI nga padayon karon ang gihimong search and rescue operation sa duha ka natalang missing sa kalamidad sa maong probinsya diin una nang nakumpirma nga usa ang casualty sa lugar.
RadyoMaN Kirby Manzon
