Raquid: ‘Kotong cops’ way luna sa DCPO Traffic Group

35

Davao City – Dili magpanukong taktakon sa serbisyo ang bisan kinsang sakop sa Davao City Police Office Traffic Group kung malambigit kini sa iligal nga mga aktibidad.

Gibatbat ni DCPO Traffic Group Chief Psupt Nolan Raquid nga hugot ang iyahang pahimangno sa iyahang mga sakop nga dili matintal kung muhangyo o bayaran sila sa ilahang madakpan atol sa gi-intensify nga kampanya kontra unsafe driving dinhi sa syudad.

“Wala miy hangyo-hangyo sa amoa trabaho lang. Ako gyod silang gibaharan nga kung adunay maghimo og ingon ana siguraduhon nakong mawala gyod sila sa serbisyo,” matud ni Raquid.

Segun ni Raquid ang kada team nga nakadeploy sa area aduna siyay gi-assign nga mga police officers nga mu-‘police’ sa ilahang tropa.

“Ginatutukan gyod nako ni sila pag-ayo para sigurado ko nga walay magbuhat o matintal sa mga ingon ana nga butang,” sumala ni Raquid.

Giawhag ni Raquid ang katawhan nga tabangan nga i-report kanila kung aduna may ‘kotong cops’ aron ila kining maaksyunan.

Samtang base sa rekord sa DCPO TG gikan Pebrero 6-17 mokabat sa 28 ka mga drivers ang gamanehong hubog o mga nakainom ang ilang nadakpan ug napaslak sa mga selda, diin 25 niini mga motorista ug 3 gamanehog 4 wheeled-vehicles.

Gipangtiketan usab ang 865 ka mga motorista nga nakalapas sa RA 10054 o walay mga helmet ug 2,279 usab ang giisyuhan og TOPs nga sagad nakalapas sa Traffic Laws dinhi sa syudad.

RadyoMaN Aimee Guinita

Facebook Comments