ILOILO CITY – Nangin aktibista si Remy Beraye sadtong 1992 sa West Visayas State University (WVSU) kag nangin kilala nga student leader.
Sa interview sang RMN Iloilo kay Mr. Elmer Forro sang Bayan Panay, ginpahayag sini nga wala na sila makibot sa gindangatan ni Beraye bangod may mga pamahog na ini sa kabuhi antes natabo ang insidente.
Suno kay Forro, nangin chairman si Beraye sang League of Filipino Students-WVSU chapter kag sang ulihi nangin Vice Chair-Person sang University Student Council (USC) sang unibersidad kag nagtapos sang kurso nga Political Science.
Sang 1994, natabo ang pinakadako nga paghulag sa syudad sang Iloilo nga ginpamunuan sang mga estudyante sang WVSU. Isa si Beraye sa mga estudyante nga nagpamuno sa rally.
Sang 2001, nagvolunteer ini bilang organisador sang Bagong Alyansang Makabayan assign sa Roxas City.
Sa iya pag-organisar, nangin dako ang papel ni Beraye sa pagtukod man sang nagkalain-lain nga organisasyon sang pumuluyo. Lakip sa mga natukod sa bulig ni Beraye ang Gabriela Capiz kag grupo sang mga nagapangayo hustisya sang mga Yolanda victims.
“Sa sini lang nga June or July nagpaabot siya sang resignation bangod sa security problems niya,” ang pahayag ni Forro.
Nahibaluan nga isa si Remy Beraye sa 3 ka mga New Peoples Army (NPA) nga napatay sa engkwentro sa tunga sang Militar kag rebelde nga NPA sa nabukid nga bahin sang Brgy. Puti-an, Cuartero, Capiz.
