Rebatajan con el pusil; unu irido

8

Un persona ya salva muerte durante el otro ya tambien incidente de tiro este vez ya sosede na Ilang-Ilang Drive, Baliwasan enantes madrogada.
El victima amo si Alnasir Jundam y Atibing, 30, casao del mencionao lugar.
Con el suspechao ya conose como si Doring Loong, quien ya escapa despues del incidente.
El victima si Jundam ya soste tiaguis irida de bala na su carillo y ya lleva conele na hospital.
Asegun con el pulis, serca man ala una enantes madrogada si Jundam ta man tomajan junto consu maga besinos.
Mientras si Loong ya abuya na lugar y aquel tiempo si Jundam ta pidi cigarilyo na tienda del su pariente cuando derepente si Loong ya planta 45 pistola conele y ya pichi el trigger donde ya rebenta este y ya tupa tiaguis na carillo di Jundam.
En este maga momento ya tene animo si Jundam para precura rebate con el pusil desde na mano di Loong.
Ya puede hace cuga si Jundam con Loong y ya puede este des-arma con Loong.
Atiempo tambien ya ayuda el cuantos maga persona standby na lugar hasta ya sapa na mano di Loong el pusil.
Ya escapa si Loong despues del incidente mientras su 45 pistola ya recobri na lugar y ya entrega con el maga pulis.
Maga pulis ta prepara ya el proprio caso que ay planta na corte contra con Loong.

Facebook Comments