Davao City – Pinasikad sa marching order ni Pres. Rodrigo Duterte, target karon sa Philippine National Police (PNP) nga hugtan pa’g maayo ang kampanya kontra iligal nga drogas.
Sa pakighinabi sa morning primetime radio social commentary program ‘Straight to the Point’ kaganina, gitataw ni PNP Spokesperson Sr. Supt. Benigno Durana, Jr. nga ilang ipatuman ang usaka ‘recalibrated war on drugs.’
Matud sa tigpamaba sa nasudnong kapulisan, ang ‘recalibrated Tokhang ug Oplan Double Barrel Reloaded’ nagtarget karon dili lamang sa gagmay’ng drug suspects apan lakip kadtong gitawag nga mga High-Value Targets (HVTs).
Parte usab sa recalibrated campaign mao ang rehabilitasyon sa mga drug reformists uban ang aktibong partisipasyon sa kabarangayan ug ang Local Government Unit (LGU).
Sa natad sa internal cleansing, gipasalig sa PNP spokesperson nga kritikal nga aspeto sa ilang kampanya mao ang paghinlo sa hut-ong sa kapulisan gikan sa mga salawayon, ‘rogue cops’ kun mga ‘police scalawags’ kinsa involved usab sa droga ug krimen.
Kagahapon, adunay usaka kanhi opisyal sa barangay sa dakbayan sa Sugbu gi-ambush apan nakaluwas sa klarong kamatayon diin usab ang mamumuno maoy napatay kinsa gi-alegar nga usa ka miyembro sa intelligence department sa Cebu Police unit.
RadyoMaN June Duterte
