Reckless driving, posibleng atubangon sa puj driver nga na-involve sa disgrasya sa Buhangin

Davao City – Aduna gayoy tulubagon ang Public Utility Jeepney (PUJ) driver sa aksidente sa Buhangin, Davao City asa mitabok ang usa ka pedestrian nga maoy gilikayan sa usa ka truck, diin kini mikalas sa kinabuhi sa driver ug helper nga naipit sa ilang kargang bakal.

Sa interview sa DXDC RMN Davao kang Bonifacio Capricho, Chief Operation sa City Transport and Traffic Management Office (CTTMO), iyahang gisaysay nga subay sa kuha sa closed-circuit television (CCTV), posibleng mag-atubang ang PUJ driver sa paglapas sa Republic Act 4136 kun reckless driving. Gawas niini, nakalapas usab ang driver sa city ordinance kalabot sa pag-load/unload og mga pasahero sa designated area asa nakita nga sa pedestrian lane kini mihunong. Matud ni Capricho, ang kaso nagdepende sa pulis.

“Based sa akoang nakita sa video, ang PUJ naa gyud syay participation didto sa pagkahitabo. Kay ngano, ang traffic light man gud is go. Supposed to be, dili gyud sya muhunong didto unya mo-unload siya og pasahero. Dili gyud ‘to munaog ang pasahero kung wala siya muhunong. Very clear gyud ‘to nga pwede siya tirahon sa violation of reckless driving,” saysay ni Capricho.

Sa report sa Buhangin Police Station, boluntaryong nang mitahan ang driver sa PUJ sa presinto ug nangayo og pasaylo sa Dabawenyos ingon man kang Mayor Sebastian “Baste” Duterte.

RadyoMaN Kirby Manzon