Itinaas ng Metro Manila Disaster Risk Reduction and Management Council (MMDRRMC) ang alert status nito sa Red Alert kaugnay ng seguridad para sa nalalapit na Traslacion.
Epektibo ang itinaas na alert status simula kaninang alas-8 ng umaga hanggang alas-8 ng umaga ng Enero 10.
Ayon sa MMDRRMC memorandum, mahigpit nang tinututukan ng Office of Civil Defense – National Capital Region (OCD-NCR) ang lahat ng aktibidad mula ngayon hanggang sa aktwal na prusisyon ng Poong Jesus Nazareno.
Activated din ang mga response clusters, kabilang ang Department of Social Welfare and Development (DSWD), National Capital Region Police Office (NCRPO), Department of Health (DOH), OCD-NCR, Metropolitan Manila Development Authority (MMDA), NCR Command (NCR COM), Department of Information and Communications Technology (DICT), Philippine Information Agency (PIA), at Department of the Interior and Local Government – NCR (DILG-NCR).
Activated din ang Regional Inter-Agency Coordinating Cell at ang lahat ng Local Disaster Risk Reduction and Management Offices (Local DRRMO) at mga Local Government Unit (LGU) sa Manila.
Layunin ng pagtaas ng alert status na palakasin ang inter-agency coordination at masiguro na may mga stand-by response teams, emergency resources at malinaw na protocols para sa mabilis na pagtugon habang isinasagawa ang relihiyosong aktibidad.
