Gipahigayon kagahapong adlawa ang reenactment o pag-aksiyon sa nahitabong ambush sa usa ka team sa Philippine Drug Enforcement Agency o PDEA, niadtong nakalabay’ng Biyernes, Oktubre 5, didto sa Kapai, Lanao del Sur.
Kauban niini ang Special Investigation Task Group nga gilangkuban sa Philippine National Police, PDEA ug Scene of the Crime Operatives o SOCO.
Miingon si Chief Superintendent Graciano Mijares, regional director sa PNP- Autonomous Region in Muslim Mindanao, nga tumong niini aron makakuha sila og insakto nga sukod sa distansiya sa sakyanan sa mga biktima ug sa mga suspek, lakip na ang distansiya sa gisakyan sa mga police – escort.
Nasuta sa maong reenactment kagahapon nga naka – posisyon sa taas nga lugar ang walo ka mga suspek, kinsa nakahigayon sa pagrakrak sa van nga gisakyan sa unom ka mgaahente sa PDEA ug usa ka non-uniformed personnel sa Tagoloan Municipal Police Station.
Layo ang maong dapit, walay signal sa cellular phone, hinungdan nga dugay nakatawag og responde, lakip na ambulance, matud pa ni Mijares.
Ang kadugay sa pag-responde, hinungdan sa kamatayon sa usa ka samaran nga namatay samtang gibiyahe paingon sa tambalanan sa Marawi City mao ang pagkahurot sa dugo niini.
Sa maong reenactment kagahapon, gipadaplin sa PNP-ARMM ang alegasyon nga adunay frame up nga nahitabo.
Hinoon ,miingon si Mijares nga naila na ang mga suspek nga mibanhig sa grupo ug nasuta nga adunay kalabutan sa operasyon sa ginadiling droga ang motibo sa maong kremin. (Divina M. Suson)
