Davao City – Lauman ang limpyo ug beripikadong listahan sa mga gikunsiderang kabus dinhi sa tibuok Rehiyon 11 sa tuig 2020.
Kini mao ang gipaniguro sa Department of Social Welfare and Development Office (DSWD-Davao) diin anaa sa 834,729 ka mga panimalay ang target nila nga masuta ang estado sa panginabuhian sa tuig 2019-2020.
Sumala ni DSWD-XI Assistant Regional Director Alfredo Sy nga atol sa ilang ikatulong hugna sa Listahan, usa ka data management system alang sa listahan sa kinsa ug asa nga lugar nahimutang ang mga pobre sa rehiyon, ginalauman nila ang posibilidad sa pagsaka sa ihap sa mga poor households.
Gibutyag ni Elvie Bahinting, DSWD Regional Field Coordinator, ng base sa Listahan 1 ug 2, anaa sa 5.2-M ang ihap sa mga pobre sa Rehiyon.
Subay niini, gipaniguro ni Sy nga mamahimong limpyo ug beripikado ang Listahan 3 sanglit usa usab kini sa basehan sa pag avail sa usa ka pamilya sa ‘Poorest of the poor’ projects sa gobyerno sama sa 4Ps.
Ang Listahan ginapahigayon human sa upat ka tuig sa DSWD uban ang partner agencies aron mamonitor ang estado sa matag pamilya diin karong tuiga sugdan kini sa ikaduhang semana sa Oktubre ug lauman ang resulta sa Agosto tuig 2020.
Sa kapin 834K ka mga panimalay sa tibuok Davao region, 148K niini an sa Compostela Valley Province; 191K sa Davao del Norte; 113K sa Davao del Sur; 72K sa Davao Oriental; 119K sa Davao Oriental; ug 190K sa Davao City.
RadyoMaN Jason Amisola
