i Balita
July 26, 2020
(Photo from web)
REGIONAL NEWS: GAME FOWL BREEDERS SA NEGROS OCCIDENTAL, NAGA-AYO NGA IBALIK NA ANG BULANG
Naga-apelar sa gobyerno ang mga manugsagod sang inugbulang nga manok sa Negros Occidental nga kuntani ibalik na ang bulang agud indi magdako ang ila mangin kapierdehan sa tunga sang coronavirus pandemic. Ang Brgy. Sta Cruz sa banwa sang Murcia ang isa sa mga lugar sa probinsiya nga madamo sang mga game fowl breeders sa diin kapin sa 300 hectares sang duta ang gina-akupar sang mga ini.
Sa interview sang DYHB RMN Bacolod kay Punong Barangay Boy Gravino, ginpalab-ot sini sa gobyerno nga kuntani ibalik na ang bulang bisan sa 50 porsyento lang nga kapasidad sang mga bulangan agud amat-amat na nga makabawi ang mga tag-iya kag mangin ang mga trabahador sa mga manokan. Nahibaluan nga humalin sang nagsugod ang pandemic, wala na ginpahanugutan ang bulang. Sa Brgy. Sta. Cruz, kapin sa 400 ang mga nagatrabaho sa nasambit nga mga manokan.
May angut diri, ginpahayag ni Provincial Veterinarian Renante Decena nga ginatugyan na nila sa Games and Amusement Board (GAB) ang pag-ayo sa National Inter-Agency Task Force (NIATF) sa pagbalik na sang bulang. Aminado si Decena nga indi lang breeders ang apektado sa pagpauntat sang bulang kundi mangin empleyado kag kompaniya nga nagabaligya sang mga feeds.
Sa kapin 7 million nga populasyon sang manok sa Negros Occidental, 4 million diri ang sa game fowl. Dugang pa ni Decena, dako ang ginabaton nga tax sang gobyerno gikan sa bulang bangud sa Negros Occidental, nagadangat sa 4-5 billion pesos ang game fowl industry.
*Tags**:Luzon,Visayas,Mindanao,Kandingmybangs, iFM Fans Club OFW Chapter, iFM iloilo*
