Davao City – Gikalipay karon sa Office of Civil Defense (OCD-XI) ang sobra
ka istrikto sa lokal nga kagamhanan sa tanang aplikante sa paglukat og
building permit alang sa pagtukod og gambalay.
Matud sa OCD-XI nga sakto ang gibuhat sa lokal nga kagamhanan sa siyudad
nga paagion sa bangag sa dagom ang tanang aplikante nga maglukat og
building permit.
Suma ni OCD-XI Spokesperson Franz Irag, mahinungdanon lili-on gyod og maayo
kun natuman ba o wala sa mga aplikante ang mga rekwisitos una tugyanan sa
building permit sanglit kinabuhi ang nakasalalay kun masunog ang usa ka
gambalay nga wala magtamod sa standard sa pagtukod og building.
Giangkon ni Irag nga walay kaugalingon nga assessment ang ilang buhatan
mahitungod sa kondisyon sa mga gambalay dinhi sa siyudad hilabi na sa
kadtong gikunsidera na nga ‘sunogable.’
Apan andam matud pa magrekomendar ang OCD-XI ugaling maglusad sila og
pre-assessment sa katukuran sa mga gambalay sa dakbayan.
Hinoon sa tan-aw sa tigpamaba nga sagad sa bag-ong mga gambalay karon
nakasunod sa standard sa Building Code of the Philippines busa kun ugaling
masunog man ang sa usa ka gambalay hayan walay madisgrasya.
Sugyot pa ni Irag ngadto sa lokal nga kagamhanan aron wala nay makabsan sa
kinabuhi sama sa halos 40 ka call center agents sa SSI kinsa na-trap ug
naapil kapaig sa pagkasunog sa NCCC Mall sa miaging tuig nga obligahon ang
mga kompanya ug ang mga empleyado nga magpahigayon og regular nga fire
drill aron masayod sila sa angay buhatan panahon dunay sunog.
RadyoMaN Joel Viray
