Davao City – Pagtutok sa kahibalo kun awareness sa katawhan pinaagi sa kanunayng pagpahinumdom ang himuon sa brgy. Mintal isip preparasyon sa dili matagna nga linog.
Sa interbyu sa DXDC RMN Davao kang Kapitan Rey Amador Bargamento sa Barangay Mintal, gibutyag niini nga ilaha nang gisugdan ang pagbansay sa katawhan sa mga angayang buhaton panahon sa mga pagtay-og.
“Magsugod na gyud ta’g duck, cover and hold. Ipabati gyud nato sa atong kauban, mga igsoon sa barangay nga mao gyud ni ang number one nimo nga kung baga skill nga imong dapat ma-master panahon nga mulinog,” saysay ni Bargamento.
Dugang ni Bargamento nga angay ang kanunayng pagpanumdon sa katawhan labi na sa mga panagtapok nga himuon sa matag purok o diha sa barangay.
“Continuous gyud ni nga pagpangandam. I-strengthen namo ‘tong awareness. Gipangayo man namo tong mga powerpoints, pictures nga gihatag sa PHIVOLCS, amo sad ning ipakita matag purok assembly o matag meeting ug matag engagement namo sa among mga kabarangay,” tataw ni Bargamento.
Nasayran nga usa lamang ang Brgy. Mintal sa 60 ka mga barangay sa syudad sa Davao nga nahimutang sa fault line.
RadyoMaN Kirby Manzon
