Davao City – Gi-awhag karon sa Department of Social Welfare and Development (DSWD) nga ipaabot sa ilang opisina ang mga reklamo labot sa Pantawid Pamilyang Pilipino Program (4Ps).
Sa pakighinabi sa DXDC RMN Davao kang Merlinda A. Paragamac, Promotive Services Division Chief sa DSWD-XI, gibutyag niini nga kung aduna may mamatikdang nahimong miyembro apan dili angayang maapil sa programa, angay kining ipaabot sa opisina aron gilayon nila kining ma-aksyunan.
“Kung naa silay mamatikdan nga sa ilang pagtan-aw ug obserbasyon nga dili gyud sila angayan sa program, please report to DSWD. Ang amo lang gikinahanglan ang pangalan ug asa nga barangay,” saysay ni Paragamac.
Gibutyag ni Paragamac nga adunay katungod ang departamento nga tanggalon kadtong benepisyaryo nga mapamatud-ang dili angayan nga mahilakip sa programa ug aduna usay proseso nga sundon labot niini.
“We have to validate the report nga dili siya angayan kay we have the process to delist or remove the beneficiary from the program kung mapamatud-an nato nga dili gyud siya angayan,” dugang ni Paragamac.
Gisaysay sa opisyal nga dili usab malikayan ang ginatawag nga “Inclusion error” o ang paghilakip sa ubang dili angayan labi na kung kini dili mo-istorya sa tinuod atol sa gihimong assessment rason nga angay kining ipalawom sa validation.
RadyoMaN Kirby Manzon
