Davao City – Dismayado ang tagdumala sa Burger King Buhangin Branch sa customer kay taliwala nga na settle na ang ilang isyu, nagpatala pa gihapon kini sa kapulisan kagahapong adlawa.
Sumala sa Manager nga dili na buot magpakutlo sa iyang pangalan nga nagtoo kini nga humana ang isyu tungod kay nahusay na ang ilang problema sa ilang customer nga si Melody Dandoy sa miaging adlaw.
Midangop sa Buhangin Pnp si Dandoy aron ipatala ang iyang kasinatian nga nakakaon kini og burger nga dunay ulod kansang napalit sa Burger King Buhangin Branch alas 5:00 sa hapon niadtong adlaw’ng Huwebes.
Ang maong customer nagpalit og tulo ka whooper meal pinaagi sa drive thru apan wala niini damha nga dunay ulod ang lettuce nga gipalaman sa burger busa imbes mabusog kaluod sa ang iyang gibati.
Nakuhaan pa og video ni Melody ang burger nga dunay ulod ug dayon gi-upload sa social media butang nga gikasakit sa tagdumala sa maong kan-anan.
Sumala sa nagpa-ilang tagdumala nga mibalik kanila si Melody aron ipahibalo ang insidente ug pareho silang nagkasabot nga i-refund ang gibayad aron sa ingon dili na musilaob pa ang isyu.
Depensa sa manager nga miagi sa makuti nga proseso sa paglimpyo ang tanang pagkaon sama sa burger una i-serve sa ilang customer hinoon wala gilimod niini nga nalutsan sila sa hugaw nga lettuce kung asa nakita ang ulod.
Naglusad na og imbestigasyon ang kumpanya aron sutaon ang hinungdan ug gikatakda ipatawag ang supplier sa lettuce aron pangayoon ang eksplanasyon ngano dunay ulod ang gisuplay nga gulay.
Gitanggal na usab matud pa ang manager ug ang mga crew nga naka-duty niadtong higayona samtang padayon nagdagan ang imbestigasyon ug posible mahibaloan ang resulta niini sa adlaw’ng Lunes sunod semana.
RadyoMaN Joel Viray
