Pa-imbestigahan sa National Housing Authority ang reklamo sa mga residente sa Marawi City ngadto sa kontraktor nga mi-demolish sa ilang mga panimalay sa sektor 1 bisan nga wala sila mitugot.
Kini tungod kay matud pa ni Roderick Ibanez, environmental planning officer sa NHA, nga bisan pa og katumbahon na ang usa ka istruktura, kung walay waiver o pagtugot sa tag-iya nga apilon kini pag-demolish, dili kini angayang ilakip sa ilang trabaho.
Ang Office of the Building Official, matud pa, maoy mo-determina kung ang usa ka istraktura, delikado o dili. Kung delikado kini ngadto sa mga trabahante apan walay waiver, angayang adunay demilition permit gikan sa nahisgutang buhatan.
Kung kahinumduman nga niadtong Lunes, usa sa gipangayo sa mga nag-protestang residente nga pa-imbestigahan ang gibuhat sa Finmat International Resources, Inc., sa ilang pagsugod sa debris clearing and management sa mga barangay sa Daguduban ug Tolali nga milangkob sa sector 1.
Una nang namahayag si Demy Tejares, project manager sa Finmat, nga ang mga aduna lamay waiver ang ilang gi-demolish. Ang ubang istraktura, matud pa, nga walay waiver, totally-collapsed na, ug ang uban mahugno na nga delikado sa ilang mga trabahante.
Temporaryo nga mihunong ang trabaho sa Finmat human makadawat og Work Suspension Order gikan sa NHA tungod kay kinahanglan pa sa kontraktor hulaton nga ma-issue ang Environmental Compliance Certificate o ECC ug demolition order gikan sa buhatan ni Mayor Majul Gandamra.
Miingon si Gandamra nga ang ECC maoy iyang basehan sa iyang pag-isyu og demolition order.
(Divina M. Suson)
| | Virus-free. www.avast.com |
