Davao City – Giklaro karon ang Department of Social Welfare and Development (DSWD) nga matag duha ka bulan ginahatag ang budget sa Pantawid Pamilyang Pilipino Program (4Ps).
Sa pakighinabi sa DXDC RMN Davao kang Gil Cauilan Jr., Project Development Officer (PDO) 1 – Grievance Division Unit sa DSWD-XI, gisaysay niini nga nagpahinumdom na sila’ng daan sa mga benepisyaryo sa programa nga maggahin na daan og budget alang sa mga panginahanglanon sa ilang mga anak sa pag-abri sa klase.
Giklaro ni Cauilan nga niadtong bulan sa Mayo katapusang gihatag ang 4Ps budget sa mga beneficiaries niini diin nagpasabot nga sa Hulyo pa ang sunod nga releasing sa maong budget ug inisyatibo na usab sa mga ginikanan nga gahinan og budget ang school supplies sa mga bata alang karong bulana.
“Ginasultian na namo ang mga beneficiaries namo nga kadtong nadawat ninyo kadtong previous two months, ipon-ipona to ninyo kay atong enrollment is June. Ug sa June dili pa ta maghatag kay sa July pa man ta maghatag. Amo na na silang gisulti-an nga tigom-tigoma aron sa May ug June maggamit na ninyo,” pagpasabot ni Cauilan.
Nasayran nga dili lamang sa Davao region kundili nationwide nga sistema ang duha ka bulan nga interval sa pagrelease sa budget sa nahisgutang programa alang kwalipikadong pamilya.
RadyoMaN Kirby Manzon
