Davao City-Pabor si Lift Jesus Theological Seminary Professor Dr. Arman Iredonia sa random drug test nga ilusad sa Department of Education alang sa mga estudyante sa Junior ug Senior High School.
Gipunto ni Iredonia nga mas maayo maluwas ang mga kabataan gikan sa paggamit sa bisyo sa droga aron dili madaot ang ilang lawas ug makaguba ang ilang kaugmaon samtang sayo pa.
Sumala ni Iredonia nga walay angay ikahadlok ang mga ginikanan sa mga estudyante tungod kay dili man sab makatugot ang deped nga maulawan ang ilang mga anak kung ugali magpositibo sa droga.
Ug kung aduna ma’y angay lang mahibawo sa resulta kana mao lang ang magtutudlo, ginikanan, ug ang hingtungdan nga estudyante aron dili mu-ubos ug maparalisa ang moralidad sa usa ka bata.
Kumbinsido ang propesor nga dili maghatud sa traumatic experience sa mga estudyante ang random drug test hilabi na kung mapasabot og maayo ang ilang mga ginikanan sa katuyuan ug tumong niini.
Gibarugan niini nga walay ikahatag nga maayo sa mga bata ang droga inay gub-on lang niini ang kaugmaon ug ang pinakapait nga dangatan mao ang hinanaling kamatayon.
Apan panawagan ni Iredonia sa gobyerno ang pag-andam og intervention program alang sa mga estudyante nga magpositibo sa droga sa ingon maluwas pa sila sa negatibo nga epekto sa kanseros nga bisyo.
Kasamang Joel Viray
